Vidar Underseth er fødd og oppvaksen i Solund i Ytre Sogn. Han byrja å spele fele i 15-16-års alderen, og fekk seinare opplæring hjå Sigmund Eikås. Vidar byrja å danse i vaksen alder, men tilhøyrer i dag eliten blant folkedansarar her i landet. Han har delteke på mange kappleikar med svært godt resultat. Tre gonger har han vunne Landskappleiken (1989, 1991 og 1994), alle tre gongane med Hilde Bjørkum som dansepartnar. I 1994 fekk dei vandrepokalen til odel og eige! Vidar har også vore på fleire turnéar for Rikskonsertane. Han er også medlem av folkemusikkgruppa "Frimann" som er CD-aktuell med plata "Almuens sanger".