ECHELON

    Det er no gått nokre år sidan den såkalla Lund-rapporten om ulovleg overvaking av norske borgarar skaka heile det politiske Noreg. Rapporten på 624 sider stadfesta det kommunistar og andre venstreinnstilte hadde hevda i alle år etter krigen, men som etablerte krinsar nekta for: Lovleg politisk verksemd vart overvaka. Rapporten viste at omfanget av denne overvakinga var større enn nokon kunne tru og at det vart tatt i bruk verre metodar for å innhente informasjon enn ein kunne ane. I desse dagar får dei første ofra innsyn i mappene sine, og innhaldet er beint fram grotesk. Stanken av overvakarane si verksemd er mildt sagt vond, men skamkjensle, anger, etikk og moral finst visst ikkje i dette miljøet.

    Mange av oss på venstresida trur ikkje at den politiske overvakinga tok slutt med Lund-rapporten. Ikkje ein einaste overvakar har blitt oppsagt, og det er liten grunn til at staben no tvinnar tommeltottar og driv med samfunnsgagnleg arbeid. Indikasjonane på at uvesenet lever vidare i same omfang, men kanskje noko betre kamuflert, er mange og sterke.

    I mai månad d.å. vart det lagt fram ein EU-rapport som viser at det amerikanske etterretningssystemet Echelon vert brukt til å overvake privat elektronisk kommunikasjon i Europa. Denne aktiviteten er så omfattande og så ille at rapporten oppfordrar alle borgarar og verksemder om å bruke kryptering! Dette er særs oppsiktsvekkande opplysningar som det må vere vanskeleg å avvise for det etablerte maktapparatet i Noreg, og som reiser ei rekke ulike spørsmål som vi no må krevje svar på, til dømes:

        · Er denne EU-rapporten seriøs og sannferdig? (sjølvsagt er den det!)

        · Kvifor bruker USA så store ressursar på denne verksemda? (er det for å kunne slå ned på framtidig opposisjon mot interessene til amerikansk monopolkapital?)

        · Kva kan slik informasjon bli brukt til i framtida? (yrkesforbod og anna diskriminering, internering og avretting i krisesituasjonar?)

        · Kvifor er EU og USA tilsynelatande så sterkt på kollisjonskurs i dette spørsmålet?

        · Kvifor vert ikkje denne illegale overvakinga på framand territorium umiddelbart stoppa?

        · Kva er Echelon? Kven står bak denne organisasjonen? Er det råd å gje dei ansvarlege namn og andlet og be dei svare for verksemda?

    Til dei media som ikkje ligg under overvakingsapparatet sin kontroll, og til styresmaktene, må vi stille følgjande krav: Full overvaking av og informasjon om Echelon! Sett saka på dagsordenen og la oss få full offentleg debatt om dette. Så får vi vone at trolla sprekk når dei får lys på seg. La oss sleppe ein reprise på dei mange åra med forteiing, benekting og latterleggjering før vi fekk Lund-rapporten. Det vil demokratiet vere tent med.

    Kjell Underlid
    NKP
    (Norges Kommunistiske Parti)

(KLIKK HER.)
TIL MARXISTISK LITTERATUR.
INNFØRINGSKURS I MARXISME.

Klikk her for å få kontakt med Nordland N.K.P. For å vite noe mere om han som vedlike holder disse sidene. For å lese Det Kommunistiske Manifest. For å lese arbidspogramet til NKP. Til NKUs sider der finer du linker til andre organisasjoner og littratur.