Det foregår i norsk presse ei samanblanding av begrepet "nasjonalisme" med "nazisme". Det beror i beste fall på rein kunnskapsløyse; i verste fall på utsegner mot betre vitande.
Eg vil her ta opp tråden frå historieprofessor Kåre Lunden (Dag og Tid 26.06.00). Han peikar på at Hitler slett ikkje var nasjonalist etter den normale definisjonen av ordet, som er utforma slik av den største internasjonale autoriteten på nasjonalisme, den engelske professoren A. D. Smith: "Nasjonalisme er den tanken at kvar nasjon har rett til å ha sin sjølvstendige stat".
Smith har slått klart fast at på dette grunnlaget er ikkje Hitler nasjonalist. Og dette går fram av Hitlers eigne ord og politiske praksis.
Han sa uttrykkeleg at "vi må avskaffe småstatsrukkelet i Europa". I staden skulle det bli ein europeisk storstat under arisk leiing "frå Atlanterhavet til Ural". Og det prøvde han å realisere, så lenge det varte.
Nå finst det ein annan, todelt definisjon, som skil mellom hegemonisk og demokratisk nasjonalisme. Ein demokratisk nasjonalisme svarer til Smiths definisjon: Dersom ei etnisk gruppe bestemmer seg for gjennom frie val å danne ein sjølvstendig stat, skal dei ha krav på det.
Den hegemoniske nasjonalismen går derimot ut på at ein bestemt nasjonalitet skal herske over andre folkeslag i området. Vi ser den hegemoniske nasjonalismen demonstrert i fleire land; Spania (Baskarland, Catalonia), Frankrike (Korsika, Bretagne), England (Wales, Skottland). Og i Norge, overfor samane.
Dermed kan vi med full rett kalle Hitler "hegemonisk nasjonalist" av ein særleg ekstrem type.
Men var Quisling nasjonalist? Nei, seier professor Lunden. Han ville innlemme Norge i Hitlers storstat. Og han refererer Quislings tale frå den såkalla "Statsakten" på Akershus, da han gjorde seg sjølv til "ministerpresident":
"Fremtiden tilhører de store statssammenslutninger. Den moderne utvikling har satt de små stater ut av spillet og lagt folkenes skjebne i hendene på de store stater. Men bare de virkelig store stater eller statssamfund, de riktige verdensmakter, har mulighet til å hevde seg i fremtiden. Det er ikke plass til mange slike på denne jord."
I talen peikar Quisling ut Norges plass på denne måten:
"I vest vil Nord-Amerika med sine uhyre hjelpekilder arve Englands stilling og fortsette dets politikk. I øst vil det russiske folkehav fortsette å øke. Uten den nyordning som nå vokser frem, med en fast sammenslutning i Europa, vil vi komme i en farlig stilling mellom to kolosser."
Det er umuleg for den som kan lese innanboks å finne "småstats-nasjonalisme" eller Senterpartipolitikk i dette sitatet.
Derimot går det an å finne liknande tankar som Quisling sto for, hos andre av dagens politikarar. Eg treng neppe nemne namn eller parti-tilknytning.
Hartvig Sætra, NKP
 |
 |
 |
 |
 |
|---|---|---|---|---|
| Klikk her for å få kontakt med Nordland N.K.P. | For å vite noe mere om han som vedlike holder disse sidene. | For å lese Det Kommunistiske Manifest. | For å lese arbidspogramet til NKP. | Til NKUs sider der finer du linker til andre organisasjoner og littratur. |