Dansk tilsettingsskandale:

Frå 1. januar i år heiter sjefen for Det danske
senter for Holocaust- og folkemordsstudier Uffe Østergaard.
Han er historieprofessor med moderne historie som spesialfelt.

    Så langt ser alt normalt ut. Men berre ei veke før tilsettinga skreiv den samme Østergaard ein artikkel i Information der han forsvarte det tyrkiske regimets undertrykking av kurdisk språk og kultur. Han går til og med så langt at han forsvarer general Evrens statskupp i 1980, og hans junta som i store trekk likna tilsvarande brutale diktatur i Hellas under Papadopoulos og i Portugal under Salazar. Hans kommentar til etniske utreinskingar, tortur og drap mot kurdarane er: "I det omfang, kurderne har accepteret den tyrkiske nationale identitet og nøjedes med at tale kurdisk i hjemmet(!), er de ikke blevet mer undertrykte end alle andre borgere i landet."

    Leyla Zana, som fekk 14 års fengsel for å tale kurdisk frå nasjonalforsamlingas talarstol, kan altså i følgje Østergaard ha det så godt. Det er hennar eiga skuld. Det er ei politisk ytring som er prega av ein iskald og skremmande høgre- ekstremisme, langt verre enn det som Jörg Haider står for. Haiders parti har aldri gått inn for, og slett ikkje praktisert, eit rasistisk forbod mot eit bestemt språk. Når vi dessutan veit at Bülent Ecevits såkalla "sosialdemokratiske" regjering har medlemmer frå det tyrkiske fascistpartiet MHP, partiet til "dei grå ulvane", må vi undrast på korfor ikkje den danske (og den norske) regjeringa for lengst har boikotta Tyrkia. Inntil vi oppdagar at Ecevits fascist-anløpne regjering er blant Israels beste venner!
    Ein ting er at regjeringa i Danmark ikkje er konsekvent i behandlinga av Tyrkia og Østerrike. Noko ganske anna er det å utnemne ein direktør for det danske instituttet for folkemord, som sjølv støttar det tyrkiske folkemordet mot kurdarane. Det er vel eit utslag av at den danske så vel som den norske regjeringa motvillig aksepterer folkemord, berre det blir utført av våre og Israels "venner". Og dei vaktar nidkjært på at begrepet Holocaust ikkje får lov til å gjelde for dei 1,1 millionar serberar som kroatane og tyskarane drap under bestialske forhold under siste krig. Slike journalistar og politikarar brukar ulike målestokkar på menneskeliv. Serbiske og kurdiske liv tel ikkje like mykje som kosovo-albanske og israelske.

    Og den jødiske Holocaust får for ørtende gong under ein konferanse i Stockholm "einerett" på begrepet holocaust. (Aller nådigst kan visst romaniane få bruke ordet. Men for serberane er det framleis bannlyst, i følgje konferansen og reportasjane derfrå.)

    Vi som er kritiske til Vestens overgrep, og til dei vestlege lands mange allierte bødlar, må ikkje la dei europeiske og amerikanske politikarane få lov til å "kvitvaske" dei rasistiske overgrepa hos sine allierte ved hjelp av skyllebøttene mot Haider. Uffe Østergaard er tidlegare dansk SF-ar, som nå er "angrande syndar" på firsprang vekk frå venstresida. Han reknar seg i dag som "euro-nasjonalist".

    Nyleg har jo ein SV-journalist skrive på SVs internettsider at serberane må forpliktast til å glømme si historie under siste krig, fordi den fristar dei til å begå overgrep. Ho "viste også stor forståelse" for at Hitlers tropper vart sett på som "befriarar" i Kosovo under siste krig.

    Kva er eigentleg forskjellen på Haider, Østergaard og andre "tidlegare sosialistar"?

    Hartvig Sætra

(KLIKK HER.)
TIL MARXISTISK LITTERATUR.
INNFØRINGSKURS I MARXISME.

Klikk her for å få kontakt med Nordland N.K.P. For å vite noe mere om han som vedlike holder disse sidene. For å lese Det Kommunistiske Manifest. For å lese arbidspogramet til NKP. Til NKUs sider der finer du linker til andre organisasjoner og littratur.