"Slaktaren"

"Det er ei lita, mørk og tungt vakta celle i Pnom Penhs militærfengsel. Inne i cella sit ein mann på 74, inntørka, kvithåra og med ein fot. Han er ved god helse og er i overraskande godt humør, når ein ser på både hans dystre fortid og hans problematiske framtid.

Han er Ta Mok, også kjent som "Slaktaren ", truleg den mest umenneskelege og brutale av alle Røde Khmer-kommandantane som gjorde Kambodsjas grønne landskap om til dødsmarker.

Statsminister Hun Sen i Kambodsja reknar med at Ta Mok blir stilt for retten neste månad. Mange i dette maltrakterte landet gleder seg over det prosjektet. Andre, inkluderte enkelte i den politiske leiarskapen, spesielt på Ranariddhs fløy, fryktar Ta Moks vitnemål vil avsløre deira eigne gjerningar under Pol Pots folkemord. Uroa er ikkje berre konsentrert til det vesle, fuktige sumplandet med ti millionar menneske som utgjer det moderne Kambodsja. For når Ta Mok inntar anklageboksen, lovar advokatane hans at ingen vil bli spart, minst av alt dei vestlege leiarane som støtta Røde Khmer også etter at dei maoistiske ekstremistane hadde blitt avslørt for sine ugjerningar. Det mest fatale elementet for Storbritannia vil vere bevisa for at britiske tropper og diplomatar hjelpte Røde Khmer i kampen om makta i Kambodsja. Da Observer kontakta Ta Mok i cella i midten av januar, slo han fast at heile rekkevidda av Londons og Washingtons hjelp til røde Khmer vil bli blottlagt gjennom rettssaka. Bevisa vil avsløre utsegnene frå Thatcher-regjeringa, og vil stadfeste at denne regjeringa godkjente støtte-operasjonen for Røde Khmer.

Ta Moks advokat, Benson Samay, sa at retten vil få detaljerte skildringar av korleis Special Air Service (SAS) mellom 1985 og 1989 dreiv ei rekke treningsleirar for Røde Khmer sine allierte i Thailand, like ved grensa til Kambodsja, og skapte ein bataljon på 250 sabotasje-ekspertar med attentat og minelegging som spesiale.

For å dekke over at den britiske regjeringa i realiteten hjelpte RK, hadde instruktørane ordre om "berre å trene soldatar frå Sihanouks og Son Sanns hærar". Men Samay seier at han vil legge fram bevis for at desse treningsleirane i alt vesentleg gagna Pol Pots hærstyrkar.

Han sa også at humanitære forsyningar til kambodsjanske flyktningar på grensa mellom Thailand og Kambodsja, vart distribuert til Pol Pots styrkar, enda det var vel kjent i Storbritannia og USA kva som gjekk for seg. Retten vil også få høyre, seier han, korleis den diplomatiske oppbakkinga både frå London og Washington til den Røde Khmer-dominerte koalisjonen var til stor hjelp og moralsk oppmuntring for Pol Pots tropper. Denne koalisjonen fekk disponere Kambodsjas plass i FN under heile åttitalet og fram til 1993." Så langt Observer.

Det blir nå gjort ein del panikkarta forsøk på å stoppe prosessen i Pnom Penh, eventuelt å føre den inn under full vestleg kontroll, slik som domstolen i Haag. Dermed ville ein kunna hindre det forsmedelege at vestlege leiarar blir innkalla som forsvarsvitne for ein av vår tids verste massemordarar. FN og Kofi Annan blir brukt av USA (enda landet ikkje har betalt for seg i FN).

Og såkalla "menneskrettsorganisasjonar" som Human Rights Watch lar seg også bruke, til stor forundring for Observer. HRW hevdar at samlingsregjeringa i Pnom Penh ikkje er "legal", enda dei to partia til Hun Sen og Ranariddh fekk bortimot åtti prosent av stemmene ved eit val som FN har godkjent.

Hartvig Sætra