OPPDRETTSFRI SONE
Bergens Tidende har 29. september ein reportasje om nokre hytteeigarar i Os kommune som protesterer mot at dei får hytteidyllen øydelagt av eit stort oppdrettsanlegg. For nokre månader sidan sto det eit lengre lesarinnlegg i same avis frå ein mann som kunne fortelje at hans barndoms fjord i ytre Sogn var ramma av ei økologisk katastrofe som følgje av eit oppdrettsanlegg der. Det er heller ikkje lenge sidan den vidgjetne Vestlands-forfattaren og kulturpersonlegdommen Norvald Tveit i eit stort portrettintervju rasa over det monsteret av eit oppdrettsanlegg som låg plassert rett utanfor huset hans. Underteikna skildra stoda i Høydalsfjord-området i Flora kommune i eit innlegg som sto på trykk i fleire aviser for nokre år sidan. Eg peika her på mange uheldige verknader av oppdrettsverksemda for miljøet i fjorden der. Dei norske fjordane er eineståande i verda og dei er blant dei fremste turistattraksjonane som landet vårt har. Oppdrettsanlegga øydelegg for turistnæringa, for småskalafiske, for hyttefolk, friluftsfolk og ikkje minst for fastbuande langs kysten. På landejorda er det strenge reguleringar og restriksjonar for oppføring av bustader og næringsbygg. Men nokre meter utanfor fjæresteinane er det nær sagt fritt fram. Dette må det bli ein slutt på. Hytteigarane i Os, og alle andre som vert plaga av at oppdrettsnæringa tek seg til rette, treng støtte. Det må mobiliserast til ei folkerørsle mot denne vandalismen. Det trengst samfunnsmessige reguleringar av oppdrettsnæringa. Om ikkje den noko tafatte Bondevik-regjeringa kan gjere noko med dette, lyt vi setje vår lit til ei ny sentrum-venstreregjering. Eg er ikkje næringsfiendtleg og Noreg treng verdiskaping. Men vi kan ikkje lenger leve med slike misforhold. Flytt oppdrettsnæringa til havs - det heiter jo "havbruk" - eller på land. Alle norske fjordar må bli oppdrettsfri sone! Kjell Underlid Medlem i Bevegelsen for sosialisme (Bfs)